ពិធីការិនី អេនជី ​​យក​ថ្ងៃ ១១ ខែ​១១ ផ្ដ​ល់​កំណើត​កូន​ប្រុស​ដោយវះកាត់

ភ្នំពេញ: ក្រោយ​រៀប​អាពាហ៍ពិពាហ៍​បាន​៣​ឆ្នាំ​ជាមួយ​បុរស​អនិកជន​​អាមេរិក​ពិធី​ ការិនី​អេនជី​កាល​ពី​ព្រឹក​ថ្ងៃ​ទី​១១ ខែ​វិច្ឆិកា បាន​សម្រាល​កូន​ប្រុស​​ដោយ​វះកាត់ ជាមួយ​វត្តមាន​ស្វាមី​នៅ​ជាប់​ប្រាណ​ផ្ដល់​កម្លាំង​ចិត្ត​យ៉ាង​កក់ក្ដៅ។
ជាមួយ​រូបថត​ជា​ច្រើន​សន្លឹក​បង្ហោះ​តាំង​ពី​រាត្រី​ម្សិលមិញ បង្ហាញ​ពីការ​ត្រៀម​ខ្លួន​ចូល​បន្ទប់​វះកាត់​សម្រាល​​កូន​​សមាជិក​ថ្មី​ ពិធីការិនី​ អេនជី ​ហាក់​បាន​រើស​ពេលា​ល្អ​​ស្វាគមន៍​សមាជិក​ថ្មី​នោះ​គឺ​ចំ​ថ្ងៃ​ទី ១១ ខែ​១១ តែ​ម្ដង។
ក្នុង​ចំណោម​រូបថត​ទាំង​នោះ​ក៏​មាន​រូបថត​​អ្នកនាង អេនជី ​ស្លៀក​ពាក់​បែប​សិច​ស៊ីប​ន្តិច ​រំលេច​​ផ្ទៃពោះ​គ្រប់​ខែ​មូល​រលោង​ដោយ​ឥត​បិត​បាំង ​ទាំង​​មាន​វត្តមាន​កុមារី​ម្នាក់​ ដែល​ត្រូវ​បាន​គេ​ខ្សឹបខ្សៀវ​ថា​ជា​កូនស្រី​ច្បង​របស់​អ្នកនាង​​ និង​ជា​តំណក់​ឈាម​រួម​ម្ចាស់​ស្នេហ៍​ពី​អតីត​កាល​ផង​ដែរ។ ក្នុង​រូបភាព​កុមារី​នោះ​ឱប​នែបនិត្យ​កាយ​អ្នកនាង អេនជី ​​ដោយ​ក្ដី​ស្រឡាញ់ ហាក់​កំពុង​ទន្ទឹង​រង់ចាំ​ប្អូន​ប្រុស​កើត​ចេញ​មក​ឃើញ​​ពិភពលោក​ទៀត​ផង។
ភ្ជាប់​រូបថត​ឱប​ក្មេង​ស្រី​ដែល​គេ​ស្គាល់ថា​ជា​កូនស្រី​ច្បង​របស់នាង ពិធីការិនី​ អេនជីបាន​សរសេរ​ថា៖ « ជួប​គ្នា​នៅ​ថ្ងៃ​ស្អែក​ណា​កូន​ប្រុស​ជា​ទី​ស្រឡាញ់ មើលjjLaza (បង​ស្រីLaza) កំពុង​រង់ចាំ​ណា… C u tomorrow my little prince (ជួប​គ្នា​ថ្ងៃ​ស្អែក​ណា​រាជបុត្រ​តូច​របស់ខ្ញុំ)»។
គួរ​បញ្ជាក់​ថាអេនជី​(NG) ជា​អតីតFreshie Girl លេខ​៤ ប្រ​ចាំ​ឆ្នាំ​២០០៥ ដែល​មាន​ឈ្មោះ​ដើម​ថា លីច័ន្ទដាលីស នាង​ត្រូវ​បាន​គេ​ស្គាល់​តាមរយៈ​ជា​ពិធីការិនី​ក្នុង​កម្មវិធី «​តន្ត្រី​ខារ៉ាបាវ» «The Star Variety Show» របស់​ស្ថានីយ​ទូរទស្សន៍​អាស៊ីអាគ្នេយ៍៕

 

ប្រភព៖ ភ្នំពេញប៉ុស្ត៏