ងៃទី១៥ ​វិច្ឆិកា សាលា​បាល់ទាត់​របស់ Honda ​នៅ​​កម្ពុជា​ចាប់​​ដំណើរ​​ការ​​

សាលា​បាល់ទាត់​​របស់​ខ្សែ​បម្រើ​ជម្រើសជាតិ​​ជប៉ុន Keisuke Honda ដែល​គ្រោង​បើក​ដំណើរការ​​នៅ​កម្ពុជា​ និង មុន​គេ​ក្នុង​តំបន់​អាស៊ីអាគ្នេយ៍​​ នឹង​​ចាប់​ផ្ដើម​ ពី​ថ្ងៃ​ទី​១៥ ខែ​វិច្ឆិកា ត​ទៅ លើ​២​ទី​តាំង​ផ្សេង​គ្នា គឺ ទីលាន​ Rooy7 Sport និង 3G Mini Football Pitch។

សាលា​បាល់ទាត់​ឈ្មោះ​ថា Soltilo Familia Soccer School នឹង​ទទួល​សិស្ស​ចូល​ហ្វឹក​ហាត់​ពី​អាយុ​៤​ឆ្នាំ ដល់​១៥​ឆ្នាំ ដោយ​ឥតគិត​ថ្លៃ​។

សម្រាប់​ទីលាន Rooy7 Sports Club នឹង​​ចាប់​ផ្ដើម​នៅ​ថ្ងៃទី១៥ វិច្ឆិកា វេលាម៉ោង​៤​ដល់​ម៉ោង​៨យប់​ ដោយ​ទទួល​បង្ហាត់​ក្មេង​អាយុ​៦ឆ្នាំ ៩ឆ្នាំ ១២​ឆ្នាំ និង ១៥​ឆ្នាំ​។ ចំណែក ទីលាន​ 3G ដំណើរការ​​នៅថ្ងៃទី១៧ វិច្ឆិកា ពី​ម៉ោង៣​ល្ងាច ដល់​៦ល្ងាច និង ទទួល​សិស្ស​អាយុ​៦ឆ្នាំ ៩​ឆ្នាំ និង ១២​ឆ្នាំ​។

គេចាំ​បាន​ថា កាល​ពី​ខែ​មិថុនា កន្លង​ទៅ Keisuke Honda បាន​មក​ទស្សនកិច្ច​នៅ​កម្ពុជាដើម្បី​ពិភាក្សាជាមួយ​នឹង​សហព័ន្ធ​បាល់ទាត់​កម្ពុជា​​ពី​គម្រោង​បើក​សាលា​បាល់ទាត់​​​មួយ​ឡើង​៕